*دمير دووارلارين فاجعه سي*
*دمير دووارلارين فاجعه سي*
شهرین بویاغی آلدی الیمدن
سئوگیمین بویاقسیز جیران گؤزلرین
نه قدر چالیشدیم قورتارانمادیم
توستونون الیندن حیران گؤزلرین
***
دمیر دووارلارین فاجعه سینده
پاس توتدو اورگیم قات- قات چوردو
ساغالماز بیر آجی حسرته دؤندو
ایچیمده دیله ییم،قات- قات چوردو
***
شهرین آدامسیز بوروقلاریندا
ایتیردیم عشقیمن سون نفس لرین
وارلیغین ان سویوق دؤنه لرینده
یاشایا بیلمه دیم دون نفس لرین
***
یاندیردی دویغومون قولون-قانادین
سئوگیمین گؤزونده اسن سویوقلار
دونداردی دیلیمده یاشام ماهنی سین
توکنمز صبریمی کسن سویوقلار
***
اؤزومو ایتردیم دونن لریمده
بویونکو گونلریم اود توتدو یاندی
دیدرگین چاغلاردا نفس چکمکدن
عاطیفم یورولدو،روحوم اوساندی
***
هئچ کیمسه توتمادی بارماقلاریمدان
عومور دوراغیندا سونا یئتیشدیم
قوجالدیم باشیمی بورودو آغ قار
عشقین سوراغیندا سونا یئتیشدیم
***
وارلیغین کیتابین واراقلادیقجا
اؤزومو گؤرمه دیم یازی لاریندا
اوتوزدوم دونیامدا اولان وار-یوخو
دمیرسل بیر عصرین دام-دوواریندا
***
مرمر تیکینتی لر یالنیز منی یوخ
آییردی شهرین تام آداملارین
قورشوملو توستونون اووجوندا بوغدو
قوجامان بیر نسلین یاشیل باهارین
***
صنعتی بزک لر،انلیک- کیرشانلار
عشقیمين حورمتین ساخلامادیلار
بو آغیر حسرتدن،آجی کدردن
ایمامی اؤزونده ائتدی اینتحار
شعر:غلامرضا امام عليزاده((امامي))
نام : غلامرضا امام علیزاده (امامی)