*دونیا دوواری*

آلیب لار الیمدن اومودلاریمی
گؤزومون اؤنونو کسن دووارلار
سالیب لار اورتایا هنده وریمی
روحومو اووجوندا سیخان حاصارلار
***
بوغونتو بیر عصرین آخشام چاغلاری
آپاریر تام منی ظولمته ساری
گئجه نین قوینوندا بایقوش سسلری
چکیر دوشونجه می حیرته ساری
***
حیرتلی کؤلگه لر،قارا کؤلگه لر
کئچیرلر اؤنومدن دار کوچه لرده
بو سویوق داورانیش اوشودور منی
ائله بیل عزراییل بیزیم شه هرده
***
جومورام اؤزومون سوسقونلوغوما
یاشام فلسفه سین دوشونن میرم
ایهاملی وارلیغین،ابهاملاری نین
ان خام فلسفه سین دوشونن میرم
***
دوشونجه م دوشونمور،نه دن یغیشمیر
کوتله لر قولونا باغلانان زینجیر
آفریقا آجیندان اؤلوم حالیندا
بیزیم ایت لریمیز اتی به ین میر
***
دوشونه بیلمیرم چال-چاغیرلارین
ایچینده یارانان اوزاقلیق لاری
یازیق لار چینینه داغ تک قالانان
تاریخ هیکلینده آلچاقلیق لاری
***
دوشونجم دوشونمور،بی-خانلار نه دن
اوجا سارای لاردان دوشمورلر یئره
ده ده مالی کیمی باخیرلار آنجاق
بوتون اینسانلارا،کنده،شه هره
***
دوشونه بیلمیرم...بیلمیریک بیزه
کیم قازیب بو درین قازاماتلاری
هانسی دیل امر ائدیب گرک تیکیلسین
آداملار دؤورونه دونیا دوواری
***
گؤزومون قارشیندا دوران دووارلار
چکیلین،گونش سیز گئدیرم الدن
روحمو یاندیریب-یاخان حاصارلار 
تؤکولون،بیلیرسیز،گئدیرم الدن
***
ایمامی اومودسوز یاشاماغ اولماز
سینیب تؤکولمه سه اوجا دووارلار
عشقین ایشیغینا یئتیشمک اولماز
کؤکدن سؤکولمه سه قوجا دووارلار


شئعیر:غلامرضا امام علیزاده*امامی