«تورکو روباعی لر »

قاراباغ

آل قانه بویانمیش قاراباغ دیر، قارا باغ

حسرت بویو سینه م ده کی داغ دیر، قارا باغ

دوشمان نه قدر تاپداسادا قامتینی

ایمز باشی نی، زیرولی داغ دیر، قاراباغ

یاشیل گوزلر

آند اولسون او سئودالی، یاشیل گوزلریوه

صحراکیمی، معنالی، یاشیل گوزلریوه

بیچاره منی ایله دین آخر مجنون

ائل ایچره او لیلالی یاشیل گوزلریوه

«جان وئردیم اوزومده، اثر یمده سن سیز»

ایللر بویو یاندیم ایچریمده سس سیز

غوربت له دلاشدیم شهریمده، سس سیز

دیل باغلی، دوداق باغلی، اوره کده غوصصه

جان وئردیم اؤزومده، اثر یمده سس سیز

حسرتده یاندیم

ایللر بویو حسرتده بوی آتدیم یاندیم

سس سیز ایچریمده اود توتوب اودلاندیم

بیر عده گلیب قویدولار شاعیر آدیمی

من بو دلی لیک عنوانینا توولاندیم 

تیکان مفتیل لر

ظولم ایله کلفجه له ندی ال- قوللاریمیز

اودلاندی اورکدن کؤکوموز، کوللاریمیز

حصر ایله دی اؤلکه می تیکان مفتیل لر

باغلاندی آنا یوردا گئدن یوللاریمیز

باشی، باش اوستدن قالادیق

دونیانی بولوب، تیکه- تیکه پارچالادیق

گاهدان بو ایشه باشی- باش اوستن قالادیق

یومدوق گؤزو، میندیک کهر آتلار بئلینه

باسقی گتیریب، قارداشی- دوستو، تالادیق

آیریلیق دردی

باخدیم آرازین گؤزلری توتقون گؤرونور

ماتملی، کدرلی- یاشلی، محزون گؤرونور

ائل دردی ائله پارچالایب دیر اوره یین

چییننده کی دالغالاردا داغون گؤرونور

دووار سینه مدن گئچدی

غم گلدی قاتار – قاتار سینه مدن گئچدی

آه بیر اوخ، اولوب، هاوار، سینه مدن گئچدی

باغلاندی گؤزوم اؤنونده کی باخماجالار

دوشدوم حاصارا، دووار سینه مدن گئچدی

غزل تئللرینی

بیر باغلاما، باغلادیم غزل تئللرینی

مضراب ایله چاغلادیم، غزل تئللرینی

تا جان تاپا شعریمده تغززول هاواسی

جانانه قوجاقلادیم، غزل تئللرینی

شعر:غلامرضا امامعلیزاده (امامی)