*آيريليق...وفاسيز قادين...حيران!*

منی من لییمدن آییراجاق دیر

ایچیمدن بویلانیب باخان آییریلیق

روحومو اود ووروب یاندیراجاقدیر

گوزومدن یاش اولوب آخان آیریلیق

***

دانیشار دیلیمی لال ائده جکدیر

الیف قامتیمی دال ائده جکدیر

منی سیندیریبان،حال ائده جکدیر

ائده جک بئلیمی کامان آییريلیق

***

چورودوب،چورودوب،ییخاجاق منی

اؤلونجه اووجوندا سیخاجاق منی

آلیشیب کونلومده یاخاجاق منی

کؤکسمو یاندیریب یاخان آیریلیق

***

بو نجور آلاودیر سؤنمک بولمه ییر

بیر کسین گؤزونون یاشین سیلمه ییر

الیندن هئچ کیمین اوزو گولمه ییر

قارانلیق دونیادا اینان آییريلیق

***

عومرومو یاندیریب کول ایله میسن

گوزومون یاشینی سئل ایله میسن

بوتون وارلیغیمی چؤل ایله میسن

الیندن اولموشام وئران آیریلیق

***

باش واردیر  بدندن آیری سالمیاسان

چوخلارین وطندن آیری سالمیسان

بویونو   دونندن آیری سالمیسان

بئزیبدیر الیندن زامان آیريلیق

***

وفاسیز قادینی آلان سن اولدون

حیرانی قلبیمدن چالان سن اولدون

جسمیمی آتشه سالان سن اولدون

آمان آی آمان،آمان آیريلیق

***

هر زامان بویلانیب باخدین بیزلره

قورخوندان تیترتمه دوشدو دیزلره

بیرگونده آیریلیق گلسین سیزلره

اوره یین قیزیشسین بیر آن آیریلیق

***

ظولموندن ائل-اوبا بوتون اوساندی

چوخ گؤزلر یاشالدی،چوخ اورک یاندی

ایمامی قارشیندا دوردو-دایاندی

ویقارلی داغ کیمی یامان،آیریلیق....!

شعر:غلامرضا امام عليزاده(امامي)